॥ dhyānam ॥ raviśaśiyutakarṇā kuṃkumāpītavarṇā maṇikanakavicitrā lolakarṇā trinetrā । abhayavaradahastā sākṣasūtrapraśastā praṇatasuranareśā siddhakāmeśvarī sā ॥ 1 ॥ aruṇakamalasaṃsthā raktapadmāsanasthā navataruṇaśarīrā muktakeśī suhārā । śavahṛdi pṛthutuṅgastanayugmā manojñā śiśuravisamavastrā sarvakāmeśvarī sā ॥ 2 ॥ vipulavibhavadātrī smeravaktrā sukeśī lalita-nakharadaṃtā sāmicandrāvanamrā । manasija-dṛṣadisthā yonimudrālasantī pavanagamanaśaktā saṃśrutasthānabhāgā । cintyā caivaṃ vidyudagniprakāśā dharmārthādyaṃ sādhakairvāñchitārthaiḥ ॥ 3 ॥ ॥ stotram ॥ jaya kāmeśi cāmuṇḍe jaya bhūtāpahāriṇi । jaya sarvagate devi kāmeśvari namo'stu te ॥ 1 ॥ viśvamūrte śubhe śuddhe virūpākṣi trilocane । bhīmarūpe śive vidye kāmeśvari namo'stu te ॥ 2 ॥ māyājaye jaye jambhe bhūtākṣi kṣubhitakṣaye । mahāmāye maheśāni kāmeśvari namo'stu te ॥ 3 ॥ bhīmākṣi bhīṣaṇe devi sarvabhūtakṣayaṅkari । karāli vikarāli ca kāmeśvari namo'stu te ॥ 4 ॥ kāli karāli vikrānte kāmeśvari harapriye । sarvaśastrabhṛte devi kāmeśvari namo'stu te ॥ 5 ॥ kāmarūpapradīpe ca nīlakūṭanivāsini । niśumbha-śumbhamathani kāmeśvari namo'stu te ॥ 6 ॥ kāmākhye kāmarūpasthe kāmeśvari harapriye । kāmanāṃ dehi me nityaṃ kāmeśvari namo'stu te ॥ 7 ॥ rudhirāsavapānāḍhya vaktre tribhuvaneśvari । mahiṣāsuravadhe devi kāmeśvari namo'stu te ॥ 8 ॥ chāgatuṣṭe mahābhīme kāmākhye suravandite । jaya kāmaprade tuṣṭe kāmeśvari namo'stu te ॥ 9 ॥ bhraṣṭarājyo yadā rājā navamyāṃ niyataḥ śuciḥ । aṣṭamyāñca caturdaśyāmupavāsī narottamaḥ ॥ 10 ॥ saṃvatsareṇa labhate rājyaṃ niṣkaṇṭakaṃ punaḥ । ya idaṃśṛṇuyād bhaktyā tava devi samudbhavam ॥ 11 ॥ sarvapāpavinirmuktaḥ paraṃ nirvāṇamṛcchati । kāmeśvari devi surāsurapriye prakāśitāmbhoja-niyantrite namaḥ । surāri-brahma-vighna-pāṭanotsuke trayīmaye devi namāmi tubhyam ॥ 12 ॥ sitāsite rakta-piśaṅga-vigrahe rūpāṇi yasyāḥ pratipāditāni । kare kapāle ca vikalpitāni śubhāśubhānāmapi tāṃ namāmi ॥ 13 ॥ kāmarūpasamudbhūte kāmapīṭhāvataṃsake । viśvādhāre mahāmāye kāmeśvari namo'stu te ॥ 14 ॥ avyaktavigrahe śānte santate kāmarūpiṇi । kālagamye pare śānte kāmeśvari namo'stu te ॥ 15 ॥ yā suṣumnāntarālasthā cintyate jyotirūpiṇi । praṇato'smi parāṃ vīrāṃ kāmeśvari namo'stu te ॥ 16 ॥ daṃṣṭrākarālavadane muṇḍamālopaśobhite । sarvataḥ sarvage devi kāmeśvari namo'stu te ॥ 17 ॥ cāmuṇḍe ca mahākāli kāli kapālahāriṇi । pāśahaste daṇḍahaste kāmeśvari namo'stu te ॥ 18 ॥ cāmuṇḍe kulamālāsye tīkṣṇadaṃṣṭre mahābale । śavayānāsthite devi kāmeśvari namo'stu te ॥ 19 ॥ iti śrī kāmākhyā stotram ।