uktaṃ ca bhairavatantre । mahādeva uvāca - prīyatāṃ bhairavo devo namo vai bhairavāya ca । deveśi deharakṣārthaṃ kāraṇaṃ kathyatāṃ dhruvam ॥ mriyante sādhakā yena vinā śmaśānabhūmiṣu । raṇeṣu cāti ghoreṣu mahāmṛtyubhayeṣu ca ॥ śṛṅgīsalīlavajreṣu jvarādivyādhivahniṣu । devyuvāca - kathayāmi śṛṇu prājña baṭukakavacaṃ śubham ॥ gopanīyaṃ prayatnena mātṛkājārajo yathā । oṃ asya śrī baṭukabhairavakavacasya ānandabhairava ṛṣistriṣṭupchandaḥ śrībaṭukabhairavo devatā baṃ bījaṃ hrīṃ śaktiḥ oṃ baṭukāyeti kīlakaṃ mamābhīṣṭasiddhyarthe jape viniyogaḥ । || kavacam || oṃ sahasrāre mahācakre karpūradhavale guruḥ || 1 || pātu māṃ baṭuko devo bhairavaḥ sarvakarmasu । pūrvasyāmasitāṅgo māṃ diśi rakṣatu sarvadā ॥ 2 ॥ āgneyāṃ ca ruruḥ pātu dakṣiṇe caṇḍabhairavaḥ । nairṛtyāṃ krodhanaḥ pātu unmattaḥ pātu paścime ॥ 3 ॥ vāyavyāṃ māṃ kapālī ca nityaṃ pāyātsureśvaraḥ । bhīṣaṇo bhairavaḥ pātu uttarāsyāṃ tu sarvadā ॥ 4 ॥ saṃhārabhairavaḥ pāyādīśānyāṃ ca maheśvaraḥ । ūrdhvaṃ pātu vidhātā ca pātāle nandako vibhuḥ ॥ 5 ॥ sadyojātastu māṃ pāyātsarvato devasevitaḥ । vāmadevo vanānte ca vane ghorastathā'vatu ॥ 6 ॥ jale tatpuruṣaḥ pātu sthale īśāna eva ca । ḍākinīputrakaḥ pātu putrān me sarvataḥ prabhuḥ ॥ 7 ॥ hākinī putrakaḥ pātu dārāṃstulākinīsutaḥ । pātu śākinikāputraḥ sainyaṃ vai kālabhairavaḥ ॥ 8 ॥ mālinīputrakaḥ pātu paśūnaśvān gajāṃstathā । mahākālo'vatu kṣetraṃ śriyaṃ me sarvato girā ॥ 9 ॥ vādyaṃ vādyapriyaḥ pātu bhairavo nityasampadā । etatkavacamīśāna tava snehātprakāśitam ॥ 10 ॥ nākhyeyaṃ naralokeṣu sārabhūtaṃ surapriyam । yasmai kasmai na dātavyaṃ kavacaṃ suradurlabham ॥ 11 ॥ na deyaṃ pariśiṣyebhyo kṛpaṇebhyaśca śaṅkaraḥ । yo dadāti niṣiddhebhyaḥ sarvabhraṣṭo bhavetkila ॥ 12 ॥ anena kavacenaiva rakṣāṃ kṛtvā vicakṣaṇaḥ । vicaranyatra kutrāpi na vighnaiḥ paribhūyate ॥ 13 ॥ mantreṇa rakṣate yogī kavacaṃ rakṣakaṃ yataḥ । tasmātsarvaprayatnena durlabhaṃ pāpacetasām ॥ 14 ॥ bhūrje rambhātvaci vāpi likhitvā vidhivatprabho । kuṅkumenāṣṭagandhena gorocanaiśca kesaraiḥ ॥ 15 ॥ dhārayetpāṭhāyedvāpi sampaṭhedvāpi nityaśaḥ । samprāpnoti phalaṃ sarvaṃ nātra kāryā vicāraṇā ॥ 16 ॥ satataṃ paṭhyate yatra tatra bhairavasaṃsthitiḥ । na śaknomi prabhāvaṃ vai kavacasyāsya varṇitum ॥ 17 ॥ namo bhairavadevāya sarvabhūtāya vai namaḥ । namastrailokyanāthāya nāthanāthāya vai namaḥ ॥ 18 ॥ ॥ iti śrīharikṛṣṇavinirmite bṛhajjyotiṣārṇave dharmaskandhe upāsanāstavake śrībaṭukabhairavopāsanādhyāye bhairava tantre devīrahasyoktaṃ śrī baṭukabhairavakavacanirūpaṇaṃ sampūrṇam ॥