॥ శ్రీ గణేశాయ నమః ॥
॥ శ్రీ ఉమామహేశ్వరాభ్యాం నమః ॥
॥ శ్రీగురవే నమః ॥
॥ శ్రీ భైరవాయ నమః ॥
శ్రీ దేవ్యువాచ ।
భగవన్సర్వవేత్తా త్వం దేవానాం ప్రీతి దాయకం ।
భైరవం కవచం బ్రూహి యది చాస్తి కృపా మయి ॥ 1 ॥
ప్రాణత్యాగం కరిష్యామి యది నో కథయిష్యసి ।
సత్యం సత్యం పునః సత్యం సత్యమేవ న సంశయః ॥ 2 ॥
ఇత్థం దేవ్యా వచః శ్రుత్వా ప్రహస్యాతిశయం ప్రభుః ।
ఉవాచ వచనం తత్ర దేవదేవో మహేశ్వరః ॥ 3 ॥
ఈశ్వర ఉవాచ
బాటుకం కవచం దివ్యం శృణు మత్ప్రాణవల్లభే ।
చండికాతంత్రసర్వస్వం బటుకస్య విశేషతః ॥ 4 ॥
తత్ర మంత్రాద్యక్షరం తు వాసుదేవస్వరూపకం ।
శంఖవర్ణద్వయో బ్రహ్మా బటుకశ్చంద్రశేఖరః ॥ 5 ॥
ఆపదుద్ధారణో దేవో భైరవః పరికీర్తితః ।
ప్రవక్ష్యామి సమాసేన చతుర్వర్గప్రసిద్ధయే ॥ 6 ॥
ప్రణవః కామదం విద్యా లజ్జాబీజం చ సిద్ధిదం ।
బటుకాయేతి విజ్ఞేయం మహాపాతకనాశనం ॥ 7 ॥
ఆపదుద్ధారణాయేతి త్వాపదుద్ధారణం నృణాం ।
కురుద్వయం మహేశాని మోహనే పరికీర్తితం ॥ 8 ॥
బటుకాయ మహేశాని స్తంభనే పరికీర్తితం ।
లజ్జాబీజం తథా విద్యాన్ముక్తిదం పరికీర్తితం ॥ 9 ॥
ద్వావింశత్యక్షరో మంత్రః క్రమేణ జగదీశ్వరి ।
॥ ఓం హ్రీం బటుకాయ ఆపదుద్ధారణాయ కురు కురు బటుకాయ హ్రీం ॥
(ఈ మంత్రాన్ని కవచం పఠించే ముందు, మరియు తరువాత, 11 మార్లు లేదా 21 మార్లు జపించాలి)
ఓం అస్య శ్రీ బటుక భైరవ బ్రహ్మ కవచస్య భైరవ ఋషిః ।
అనుష్టుప్ ఛందః । శ్రీ బటుక భైరవో దేవతా ।
మమ శ్రీ బటుక భైరవ ప్రసాద సిద్ధ్యర్థే జపే వినియోగః ॥
అథ పాఠః ।
ఓం పాతు నిత్యం శిరసి పాతు హ్రీం కంఠదేశకే ॥ 10 ॥
బటుకాయ పాతు నాభౌ చ ఆపదుద్ధారణాయ చ ॥
కురుద్వయం లింగమూలే త్వాధారే వటుకాయ చ ॥ 11 ॥
సర్వదా పాతు హ్రీం బీజం బాహ్వోర్యుగలమేవ చ ॥
షడంగసహితో దేవో నిత్యం రక్షతు భైరవః ॥ 12 ॥
ఓం హ్రీం బటుకాయ సతతం సర్వాంగం మమ సర్వదా ॥
ఓం హ్రీం పాదౌ మహాకాలః పాతు వీరాసనో హృది ॥ 13 ॥
ఓం హ్రీం కాలః శిరః పాతు కంఠదేశే తు భైరవః ॥
గణరాట్ పాతు జిహ్వాయామష్టాభిః శక్తిభిః సహ ॥ 14 ॥
ఓం హ్రీం దండపాణిర్గుహ్యమూలే భైరవీసహితస్తథా ॥
ఓం హ్రీం విశ్వనాథః సదా పాతు సర్వాంగం మమ సర్వదః ॥ 15 ॥
ఓం హ్రీం అన్నపూర్ణా సదా పాతు చాంసౌ రక్షతు చండికా ॥
ఆసితాంగః శిరః పాతు లలాటం రురుభైరవః ॥ 16 ॥
చండభైరవః పాతు వక్త్రం కంఠం శ్రీక్రోధభైరవః ॥
ఉన్మత్తభైరవః పాతు హృదయం మమ సర్వదా ॥ 17 ॥
నాభిదేశే కపాలీ చ లింగే భీషణభైరవః ॥
సంహారభైరవః పాతు మూలాధారం చ సర్వదా ॥ 18 ॥
బాహుయుగ్మం సదా పాతు భైరవో మమ కేవలం ॥
హంసబీజం పాతు హృది సోఽహం రక్షతు పాదయోః ॥ 19 ॥
ప్రాణాపానౌ సమానం చ ఉదానం వ్యానమేవ చ ॥
రక్షతు ద్వారమూలే చ దశదిక్షు సమంతతః ॥ 20 ॥
ప్రణవం పాతు సర్వాంగం లజ్జాబీజం మహాభయే ॥
ఇతి శ్రీబ్రహ్మకవచం భైరవస్య ప్రకీర్తితం ॥ 21 ॥
చతువర్గప్రదం నిత్యం స్వయం దేవప్రకాశితం ॥
యః పఠేచ్ఛృణుయాన్నిత్యం ధారయేత్కవచోత్తమం ॥ 22 ॥
సదానందమయో భూత్వా లభతే పరమం పదం ॥
యః ఇదం కవచం దేవి చింతయేన్మన్ముఖోదితం ॥ 23 ॥
కోటిజన్మార్జితం పాపం తస్య నశ్యతి తత్క్షణాత్ ॥
జలమధ్యేఽగ్నిమధ్యే వా దుర్గ్రహే శత్రుసంకటే ॥ 24 ॥
కవచస్మరణాద్దేవి సర్వత్ర విజయీ భవేత్ ॥
భక్తియుక్తేన మనసా కవచం పూజయేద్యది ॥ 25 ॥
కామతుల్యస్తు నారీణాం రిపూణాం చ యమోపమః ॥
తస్య పాదాంబుజద్వందం రాజ్ఞాం ముకుటభూషణం ॥ 26 ॥
తస్య భూతిం విలోక్యైవ కుబేరోఽపి తిరస్కృతః ॥
యస్య విజ్ఞానమాత్రేణ మంత్రసిద్ధిర్న సంశయః ॥ 27 ॥
ఇదం కవచమజ్ఞాత్వా యో జపేద్బటుకం నరః ॥
న చాప్నోతి ఫలం తస్య పరం నరకమాప్నుయాత్ ॥ 28 ॥
మన్వంతరత్రయం స్థిత్వా తిర్యగ్యోనిషు జాయతే ॥
ఇహ లోకే మహారోగీ దారిద్ర్యేణాతిపీడితః ॥ 29 ॥
శత్రూణాం వశగో భూత్వా కరపాత్రీ భవేజ్జడః ॥
దేయం పుత్రాయ శిష్యాయ శాంతాయ ప్రియవాదినే ॥ 30 ॥
కార్పణ్యరహితాయాలం బటుకభక్తిరతాయ చ ॥
యోఽపరాగే ప్రదాతా వై తస్య స్యాదతిసత్వరం ॥ 31 ॥
ఆయుర్విద్యా యశో ధర్మం బలం చైవ న సంశయః ॥
ఇతి తే కథితం దేవి గోపనీయం స్వయోనివత్ ॥ 32 ॥
॥ ఇతి శ్రీ రుద్రయామలోక్తం శ్రీ బటుక భైరవ బ్రహ్మ కవచం సంపూర్ణం ॥