devarāja-sevyamāna-pāvanāṃghri-paṅkajaṃ
vyāla-yajña-sūtram-indu-śekharaṃ kṛpākaram .
nāradādi-yogi-vṛnda-vanditaṃ digaṃbaraṃ
kāśikāpurādhinātha-kālabhairavaṃ bhaje .. 1..
bhānu-koṭi-bhāsvaraṃ bhavābdhi-tārakaṃ paraṃ
nīlakaṇṭham-īpsitārtha-dāyakaṃ trilocanam .
kālakālam-aṃbujākṣam-akṣaśūlam-akṣaraṃ
kāśikāpurādhinātha-kālabhairavaṃ bhaje .. 2..
śūla-ṭaṃka-pāśa-daṇḍa-pāṇim-ādikāraṇaṃ
śyāma-kāyam-ādidevam-akṣaraṃ nirāmayam .
bhīma-vikramaṃ prabhuṃ vicitra-tāṇḍava-priyaṃ
kāśikāpurādhinātha-kālabhairavaṃ bhaje .. 3..
bhukti-mukti-dāyakaṃ praśasta-cāru-vigrahaṃ
bhakta-vatsalaṃ sthitaṃ samasta-loka-vigraham
vinikvaṇan-manojña-hema-kiṅkiṇī-lasatkaṭiṃ
kāśikāpurādhinātha-kālabhairavaṃ bhaje .. 4..
dharma-setu-pālakaṃ tvadharma-mārga-nāśakaṃ
karma-pāśa-mocakaṃ suśarma-dāyakaṃ vibhum .
svarṇa-varṇa-śeṣa-pāśa-śobhitāṃga-maṇḍalaṃ
kāśikāpurādhinātha-kālabhairavaṃ bhaje .. 5..
ratna-pādukā-prabhābhirāma-pāda-yugmakaṃ
nityam-advitīyam-iṣṭadaivataṃ niraṃjanam .
mṛtyu-darpa-nāśanaṃ karāla-daṃṣṭra-mokṣadaṃ
kāśikāpurādhinātha-kālabhairavaṃ bhaje .. 6..
aṭṭahāsa-bhinna-padmajāṇḍa-kośa-saṃtatiṃ
dṛṣṭi-pāta-naṣṭa-pāpa-jālam-ugra-śāsanam .
aṣṭa-siddhi-dāyakaṃ kapāla-mālikā-dharaṃ
kāśikāpurādhinātha-kālabhairavaṃ bhaje .. 7..
bhūta-saṃgha-nāyakaṃ viśāla-kīrti-dāyakaṃ
kāśi-vāsa-loka-puṇya-pāpa-śodhakaṃ vibhum
nīti-mārga-kovidaṃ purātanaṃ jagat-patiṃ
kāśikāpurādhinātha-kālabhairavaṃ bhaje .. 8..
kālabhairavāṣṭakaṃ paṭhaṃti ye manoharaṃ
jñāna-mukti-sādhanaṃ vicitra-puṇya-vardhanam .
śoka-moha-dainya-lobha-kopa-tāpa-nāśanaṃ
te prayānti kālabhairavāṃghri-sannidhiṃ narā dhruvam .. 9..